काठमाडौं नेपालको वैदेशिक व्यापार चालु आर्थिक वर्ष २०८२/८३ को पहिलो सात महिनामा उल्लेखनीय रूपमा विस्तार भएको छ। भन्सार विभाग का अनुसार साउनदेखि माघसम्मको अवधिमा कुल वैदेशिक व्यापार १५.७६ प्रतिशतले वृद्धि भई १२ खर्ब ९१ अर्ब ६३ करोड रुपैयाँ पुगेको छ। आयात र निर्यात दुवै बढेसँगै नेपालको अर्थतन्त्रमा नयाँ बहस सुरु भएको छ।
समीक्षा अवधिमा नेपालको वैदेशिक व्यापार अन्तर्गत निर्यात ३२.१९ प्रतिशतले वृद्धि भई १ खर्ब ६८ अर्ब १४ करोड रुपैयाँ पुगेको छ। अघिल्लो वर्ष सोही अवधिमा निर्यात १ खर्ब २७ अर्ब २० करोड रुपैयाँमा सीमित थियो। निर्यातको हिस्सा ११.४० प्रतिशतबाट बढेर १३.०२ प्रतिशत पुग्नुले वैदेशिक व्यापार सन्तुलनतर्फ केही सकारात्मक संकेत देखाएको छ।
निर्यात हुने वस्तुहरूमध्ये प्रशोधित सोयाबिन तेल ६ अर्ब ६७ करोड रुपैयाँसहित अग्रस्थानमा रहेको छ। त्यस्तै ८ अर्ब ६१ करोड रुपैयाँबराबरको अलैंची र ५ अर्ब ७८ करोड रुपैयाँबराबरको सूर्यमुखी तेल निर्यात भएको छ।
नेपालको वैदेशिक व्यापारमा आयाततर्फ पनि वृद्धि देखिएको छ। सात महिनामा आयात १३.६५ प्रतिशतले बढेर ११ खर्ब २३ अर्ब ४८ करोड रुपैयाँ पुगेको छ। आयात उच्च रहँदा व्यापार घाटा १०.९१ प्रतिशतले बढेर ९ खर्ब ५५ अर्ब ३४ करोड रुपैयाँ पुगेको छ।
आयातित वस्तुहरूमा पेट्रोलियम पदार्थ र कच्चा सोयाबिन तेलको वर्चस्व कायम छ। समीक्षा अवधिमा ७० अर्ब ९९ करोड रुपैयाँबराबरको कच्चा सोयाबिन तेल आयात भएको छ। साथै ६९ अर्ब ९१ करोड रुपैयाँको डिजेल, ३८ अर्ब १३ करोड रुपैयाँको पेट्रोल र ३१ अर्ब ८५ करोड रुपैयाँको एलपी ग्यास आयात भएको छ।
प्रविधि तथा विलासितातर्फ २६ अर्ब ६८ करोड रुपैयाँबराबरको स्मार्टफोन आयात भएको छ भने ५१ किलोवाटदेखि १०० किलोवाट क्षमताका विद्युतीय कार, जिप र भ्यान ८ अर्ब ७६ करोड रुपैयाँबराबर आयात भएका छन्।
नेपालको वैदेशिक व्यापार मा वीरगन्ज भन्सारको योगदान सबैभन्दा बढी देखिएको छ। कुल आयातको ४६.२० प्रतिशत हिस्सा वीरगन्जबाट भएको छ, जहाँबाट ५ खर्ब १९ अर्ब रुपैयाँको आयात र ५७ अर्ब ७३ करोड रुपैयाँको निर्यात भएको छ।
त्यसैगरी भैरहवा भन्सारबाट १४.६९ प्रतिशत र विराटनगर भन्सारबाट १२.०५ प्रतिशत आयात भएको छ। हवाई मार्गबाट हुने व्यापार पनि उल्लेखनीय रहेको छ, जहाँ त्रिभुवन अन्तर्राष्ट्रिय विमानस्थल बाट १ खर्ब २६ अर्ब रुपैयाँबराबरको वस्तु आयात भएको छ।
radiomirmire
प्रतिक्रिया