हिरासतमा २२ वर्षीय युवकको मृत्यु प्रकरण: सत्यतथ्य छानबिनको माग गर्दै सांसदहरू धर्नामा

हिरासतमा २२ वर्षीय युवकको मृत्यु: सत्यतथ्य छानबिनको माग गर्दै सिन्धुलीमा सांसदहरूको धर्ना सिन्धुली– प्रहरी हिरासतमा मृत्यु भएका सुनकोसी गाउँपालिका–३ का २२ वर्षीय श्रीकृष्ण विकको घटना रहस्यमय बनेको छ। वैशाख ७ गते राति इलाका प्रहरी कार्यालय, खुर्कोटको हिरासतमा मृत्यु भएका विकको शव ५ दिन बितिसक्दा पनि परिवारले बुझ्न मानेका छैनन्। घटनालाई शंकास्पद मान्दै पीडित परिवार र दलित अधिकारकर्मीहरूले न्यायका लागि आन्दोलन थालेका छन्।

घटनाको पृष्ठभूमि खोटाङकी एक बालिकासँग अन्तरजातीय प्रेमविवाह गरेका विकविरुद्ध बालिकाको परिवारले जबरजस्ती करणीको मुद्दा दर्ता गराएपछि उनलाई काठमाडौंबाट पक्राउ गरी सिन्धुली पठाइएको थियो। प्रहरीका अनुसार वैशाख ७ गते साँझ उनले हिरासतको भेन्टिलेटरमा सर्टको पासो लगाएर आत्महत्याको प्रयास गरेका थिए। उपचारका लागि अस्पताल पुर्‍याइए पनि त्यही साँझ उनको मृत्यु भयो।

पीडित परिवारको आरोप मृतककी आमा बिन्दामाया विकले छोराको मृत्यु आत्महत्या नभई प्रहरीको कुटाइबाट भएको दाबी गरेकी छन्। “सर्टको पासोले मान्छे झुन्डिन सक्दैन, यो घटना सुनियोजित छ,” उनले भनिन्। उनले प्रहरीले आफूहरूलाई घटनाबारे सही जानकारी नदिएको र जानाजान फसाउने नियतले ‘बालविवाह’को सट्टा ‘जबरजस्ती करणी’को मुद्दा लगाइएको आरोप लगाइन्।

संसदहरूको अनिश्चितकालीन धर्ना घटनाको निष्पक्ष छानबिनको माग गर्दै दलित समुदायका सांसदहरू जिल्ला प्रशासन कार्यालय सिन्धुलीको गेटमा धर्नामा बसेका छन्। बिहीबार रातिदेखि सुरु भएको धर्नामा सांसदहरू खगेन्द्र सुनार, रिमा विश्वकर्मा, सुष्मा स्वर्णकार, गणेश विक, खिमा विश्वकर्मा र आशिष गजुरेल सहभागी छन्।

सांसद सुनारले आफ्नो सामाजिक सञ्जालमार्फत मागहरू सार्वजनिक गरेका छन्:

• उच्चस्तरीय छानबिन समिति र संसदीय छानबिन समिति गठन हुनुपर्ने।
• दोषी देखिएका स्थानीय प्रशासन र प्रहरी अधिकारीहरूलाई तत्काल निलम्बन गरिनुपर्ने।
• जाहेरवालाविरुद्ध जातीय हिंसाको मुद्दामा कारबाही हुनुपर्ने।

प्रहरीको भनाइ जिल्ला प्रहरी कार्यालय सिन्धुलीका प्रवक्ता सूर्यप्रकाश सुवेदीले घटनालाई लिएर फैलाइएका विवरणहरू भ्रामक भएको दाबी गरेका छन्। उनले घटनाको छानबिन गर्न सहायक प्रमुख जिल्ला अधिकारी दिपेन्द्र पौडेलको संयोजकत्वमा पीडित परिवार र सरोकारवाला निकायसमेत सम्मिलित एक छानबिन समिति गठन गरिएको जानकारी दिएका छन्।

सत्यतथ्य सार्वजनिक नभएसम्म र दोषीमाथि कारबाही नभएसम्म शव नबुझ्ने पीडित परिवारको अडान छ। सो क्षेत्रमा अहिले तनावपूर्ण अवस्था रहेको छ।