क्षेत्रीय सुरक्षा चुनौतीलाई देखाउँदै पाकिस्तानले रक्षा बजेट १८ प्रतिशतले बढाउने

 काठमाडौँ। पाकिस्तान सरकारले आफ्नो रक्षा बजेटमा भारी वृद्धि गर्ने तयारी गरेको छ। संसद्‌मा प्रस्तुत बजेट मस्यौदाअनुसार पाकिस्तानले सैन्य खर्च १८ प्रतिशतले बढाएर ३ हजार अर्ब रुपैयाँ पुर्‍याउन लागेको हो।

पाकिस्तानका अर्थमन्त्री मोहम्मद औरंगजेबले क्षेत्रीय असुरक्षा र बदलिँदो परिस्थितिका कारण रक्षा बजेट बढाउनु परेको संसद्‌मा बताउनुभएको छ। रक्षा विश्लेषकहरूका अनुसार छिमेकी मुलुक भारतसँगको सीमा तनाव र सैन्य प्रविधिको आधुनिकीकरण नै पाकिस्तानको यो कदमको मुख्य कारण हो। गत वर्ष भारतले चलाएको ‘अपरेसन सिन्दूर’ पछि दक्षिण एसियाको भू-राजनीति थप तातिएको छ।

यसका साथै, अफगानिस्तानसँगको पश्चिमी सीमा क्षेत्रमा बढेको उग्रवादी आक्रमण र तनावले पनि पाकिस्तानलाई सैन्य खर्च बढाउन बाध्य पारेको हो। यद्यपि, आर्थिक संकट र अन्तर्राष्ट्रिय मुद्रा कोषको दबाबका बीच रक्षा बजेट बढाउँदा पाकिस्तानको आन्तरिक विकास निर्माणका काम प्रभावित हुन सक्ने अर्थशास्त्रीहरूले अनुमान गरेका छन्। आगामी जुलाई १ देखि सुरु हुने नयाँ आर्थिक वर्षका लागि यसै महिनाको अन्त्यसम्ममा यो प्रस्ताव पारित गर्ने पाकिस्तान सरकारको तयारी छ।