सभामुख अर्यालद्वारा पूर्वसभामुखहरूसँग परामर्श

काठमाडौँ: सभामुख डोलप्रसाद (डीपी) अर्यालले संसदीय अभ्यासलाई थप प्रभावकारी र सुदृढ बनाउन पूर्वसभामुखहरूसँग छलफल सुरु गरेका छन्। सोमबार बिहान भएको भेटघाटमा पूर्वसभामुखद्वय देवराज घिमिरे र अग्निप्रसाद सापकोटाको सहभागिता थियो।

भेटका क्रममा संसद् सञ्चालन, विधायन प्रक्रियामा सुधार र संसदीय अनुभवहरूको आदानप्रदानका विषयमा गहन छलफल भएको सभामुखको सचिवालयले जनाएको छ। विशेषगरी कानुन निर्माणका क्रममा देखिने प्रक्रियागत जटिलतालाई पूर्वसभामुखहरूको अनुभवका आधारमा समाधान गर्न यो भेटघाट केन्द्रित रहेको थियो। लोकतान्त्रिक मूल्य-मान्यता र संसदीय मर्यादालाई संस्थागत गर्न ‘अनुभव हस्तान्तरण’को अभियानस्वरूप सभामुख अर्यालले आफ्नो सक्रियता बढाएका हुन्।