नेपाली कम्युनिस्ट पार्टी (नेकपा) का संयोजक तथा पूर्वप्रधानमन्त्री पुष्पकमल दाहाल ‘प्रचण्ड ले संविधानमाथि कुनै पनि प्रकारको छेडखानी भए सदन र सडक दुवैबाट आन्दोलन गर्ने चेतावनी दिएका छन्। जनताको लामो संघर्ष र बलिदानबाट प्राप्त अधिकार कटौती गर्न नदिने अडान प्रचण्डले दोहोर्याएका हुन्।
शनिबार अखिल नेपाल महिला संघ (क्रान्तिकारी) सम्पर्क समन्वय प्रदेशले नयाँ वर्ष २०८३ को उपलक्ष्यमा आयोजना गरेको क्यालेन्डर विमोचन तथा शुभकामना आदानप्रदान कार्यक्रमलाई सम्बोधन गर्दै प्रचण्डले यो कडा अभिव्यक्ति दिए।
प्रचण्डले वर्तमान राष्ट्रिय स्वतन्त्र पार्टी नेतृत्वको सरकारलाई स्पष्ट सन्देश दिएका छन्। यदि सरकारले संविधानभित्र रहेर रचनात्मक तथा जनहितका काम गर्छ भने नेकपाले सकारात्मक सहयोग गर्ने बताए। तर संविधानमाथि छेडखानी, राष्ट्रिय हितमा आँच पुर्याउने वा जनताको हकअधिकार खोस्ने प्रयास भए चुप लागेर नबस्ने चेतावनी दिए।
“यो संविधानभित्र रहेर सरकारले राम्रो काम गर्दा हामी सकारात्मक ढङ्गले हेर्छौं। तर संविधानमाथि छेडखानी हुन थाल्यो, नेपालको राष्ट्रिय हितमाथि आँच आउन थाल्यो वा जनताले पाएका हकअधिकार खोस्ने गतिविधि भए हामी सदनभित्र र सडकबाट प्रतिवाद गर्छौं,” प्रचण्डको भनाइ छ।
कार्यक्रममा प्रचण्डले विशेष गरी विद्यार्थी अधिकार र कर्मचारी ट्रेड युनिय को अधिकारमाथि सरकारले प्रश्न उठाउन खोजेकोप्रति चिन्ता व्यक्त गरे। उनले कार्यकर्ता तथा जनवर्गीय संगठनहरूलाई सतर्क रहन आग्रह पनि गरे।
“जनताले लामो संघर्ष, ठूलो त्याग र बलिदान गरेर प्राप्त गरेका अधिकारमाथि कुनै छेडखानी हुन दिने छैनौं,” प्रचण्डले जोड दिए।
संविधान संशोधनको चर्चालाई लिएर पनि प्रचण्डले आफ्नो पार्टीको स्पष्ट धारणा राखे। नेकपा संविधान संशोधनको विरोधी नभएको तर संशोधनले महिला, दलित, उत्पीडित वर्गको अधिकार थप्नुपर्ने र संघीयतालाई बलियो बनाउनुपर्ने बताए।
“संविधान संशोधनका हामी विरोधी त छैनौं, तर त्यो महिलाहरूको अधिकार थप्न, जनतालाई अधिकार थप्न र संघीयतालाई बलियो बनाउनका लागि हुनुपर्छ। खोस्नका लागि होइन,” प्रचण्डले भने।
यस्तो संशोधन भएमा नेकपाले सकारात्मक भूमिका खेल्ने र पूर्ण सहयोग गर्ने उनको भनाइ थियो।
हालै सम्पन्न निर्वाचनलाई प्रचण्डले असामान्य र असाधारण भनेका छन्। पार्टीले निर्वाचन परिणामको गम्भीर समीक्षा गरिरहेको जानकारी दिँदै उनले आगामी दिनमा जनताको बीचमा गएर आत्मसमीक्षा सहित अगाडि बढ्ने बताए।
नेकपा एकीकरण प्रक्रियालाई तीव्रता दिइएको छ। केही दिनभित्रै तल्लो तह (जिल्ला र स्थानीय) सम्म एकीकरण टुङ्ग्याउने र त्यसपछि जनवर्गीय संगठन तथा विभागहरूको एकीकरण गर्ने योजना छ। प्रचण्डले ६ महिनाभित्र महाधिवेशन सम्पन्न गर्ने प्रतिबद्धता जनाएका छन्।
“हामीले सोचेको भन्दा फरक ढङ्गले निर्वाचन परिणाम आएको छ। तर चिन्तित हुनुपर्ने अवस्था छैन। हामी आत्मसमीक्षा गर्दै जनताको बीचमा जान्छौं,” प्रचण्डले भने।
उनले १२ बुँदे समझदारी र शान्ति प्रक्रियाका सहयात्री शक्तिहरूसँग हातेमालो गर्दै अघि बढ्ने आवश्यकता पनि औंल्याए।
यो सम्बोधनलाई राजनीतिक वृत्तमा निकै महत्वका साथ हेरिएको छ। वर्तमान सरकार गठन भएको छोटो समयमै प्रमुख विपक्षी दल नेकपाका संयोजकबाट यति कडा चेतावनी आउनुले आगामी दिनमा राजनीतिक घटनाक्रम कसरी अगाडि बढ्छ भन्ने संकेत गरेको छ।
संविधान जोगाउने, जनअधिकार रक्षा गर्ने र संघीयता सुदृढ गर्ने मुद्दा नेकपाले मुख्य एजेन्डा बनाउने देखिन्छ। प्रचण्डले महिला संघ कार्यक्रममार्फत दिएको यो अभिव्यक्तिले पार्टीभित्र महिला तथा उत्पीडित वर्गलाई पनि केन्द्रमा राखेर राजनीति गर्ने सन्देश दिएको छ।
पूर्वप्रधानमन्त्री प्रचण्डको यो अभिव्यक्ति नेपालको वर्तमान राजनीतिक परिदृश्यमा सन्तुलन कायम राख्न र जनताको अधिकार संरक्षण गर्न महत्वपूर्ण छ। नेकपाले सदन र सडक दुवै मोर्चाबाट लड्ने तयारी गरेको स्पष्ट सन्देशले सरकारलाई पनि सजग बनाउने देखिन्छ।
जनताको अधिकार, संविधानको रक्षा र राष्ट्रिय हित मुख्य प्राथमिकता रहेको भन्दै प्रचण्डले दिएको यो चेतावनीले आगामी दिनमा ठूलो बहस सिर्जना गर्ने निश्चित छ।
radiomirmire
प्रतिक्रिया