अस्ट्रेलियन क्रिकेट स्टार डेभिड वार्नर काठमाडौँ गोर्खाजबाट एनपीएल खेल्ने

अस्ट्रेलियाका प्रख्यात क्रिकेट खेलाडी डेभिड वार्नरले नेपाल प्रिमियर लिग (एनपीएल) मा काठमाडौँ गोर्खाजबाट खेल्ने भएका छन्। दशैँलगत्तै नेपाल आइपुग्ने तयारीमा रहेका वार्नर एनपीएलको इतिहासमै अहिलेसम्मका सबैभन्दा चर्चित र ठूला विदेशी खेलाडी मानिएका छन्।

अस्ट्रेलियालाई सन् २०१५ र २०२३ को एकदिवसीय विश्वकप तथा सन् २०२१ को टी-२० विश्वकप दिलाउन महत्त्वपूर्ण भूमिका खेलेका वार्नर सन् २०२१ को टी-२० विश्वकपमा ‘प्लेयर अफ द सिरिज’ समेत बनेका थिए। अस्ट्रेलियाका लागि ११२ टेस्ट, १६१ एकदिवसीय र १ि१० टी-२० अन्तर्राष्ट्रिय म्याच खेलेका वार्नरको नाममा ४९ शतकसहित झन्डै १९ हजार अन्तर्राष्ट्रिय रन दर्ता छ। टी-२० क्रिकेटमा १४२ भन्दा बढीको स्ट्राइक रेटमा ३ हजार २७७ रन बनाएका उनको टेस्टमा ८ हजार ७८६ र एकदिवसीयमा ६ हजार ९३२ रन छ।

पछिल्लो पटक सन् २०२४ को टी-२० विश्वकप खेलेका वार्नरले सन् २०१९ मा पाकिस्तानविरुद्ध एडिलेडमा अविजित ३३५ रनको उत्कृष्ट इनिङ्स खेलेका थिए। मंगलबार सामाजिक सञ्जालमार्फत नेपाल आउन पाउँदा उत्साहित रहेको र एनपीएलले धेरैलाई खुसी दिलाउने विश्वास व्यक्त गर्दै उनले काठमाडौँबाट खेल्ने पुष्टि गरेका हुन्। काठमाडौँ गोर्खाजले यसअघि नै श्रीलंकाका सहन अराचचिगे र भारतका केएस भरतलाई अनुबन्ध गरिसकेको छ।