इङ्खु नदी थुनिएर बन्यो अस्थायी ताल: दूधकोशी र सप्तकोशी तटीय क्षेत्रमा उच्च सतर्कता अपनाउन अपिल

निरन्तरको भारी वर्षा र पहिराका कारण सोलुखुम्बुको महाकुलुङ गाउँपालिका-१, चेरेम गाउँमुनि इङ्खु नदी थुनिएर अस्थायी ताल (बाँध) बनेको छ। नदीको प्राकृतिक बहाव अचानक रोकिएपछि तटीय क्षेत्रमा बाढीको जोखिम बढेकाले प्रशासनिक तथा सुरक्षा निकायले उच्च सतर्कता अपनाउन थालेका छन्।

पहिराले बनेको उक्त अस्थायी बाँध जुनसुकै बेला फुटन सक्ने खतरा रहेकाले इङ्खु, दूधकोशी र सप्तकोशी नदी आसपासका बासिन्दालाई विशेष सचेत रहन आग्रह गरिएको छ।

मन्त्री शेर्पाद्वारा सतर्क रहन अपिल

कोशी प्रदेश सरकारका आन्तरिक मामिला तथा कानुन मन्त्री गोम्बु शेर्पाले तटीय क्षेत्रका बासिन्दाहरूलाई उच्च सतर्कता अपनाउन अपिल गर्नुभएको छ। हाल ठुलो मानवीय वा भौतिक क्षतिको तत्काल सम्भावना नरहे पनि वर्षा र पहिरोका कारण जोखिम कायमै रहेको उहाँले बताउनुभयो।

“चेरेम गाउँमुनि गएको पहिरोका कारण इङ्खु नदी थुनिएर अस्थायी ताल बनेको आधिकारिक जानकारी प्राप्त भएको छ,” मन्त्री शेर्पाले भन्नुभयो, “स्थिति नियन्त्रण बाहिर नरहे पनि continuous वर्षाले जोखिम बढाउन सक्ने भएकाले नदी किनारका बासिन्दाले विशेष सतर्कता अपनाउनु जरुरी छ। प्रदेश सरकार र सुरक्षा निकाय पूर्ण निगरानीमा छन्।”

हाल घटनास्थल आसपासका क्षेत्रमा सुरक्षाकर्मी र स्थानीय तहका प्रतिनिधिहरूले स्थितिको निरन्तर अनुगमन गरिरहेका छन्। स्थानीय प्रशासनले नदी किनार तथा बगर क्षेत्रमा नजान र सुरक्षित स्थानमा रहन सर्वसाधारणलाई अनुरोध गरेको छ।