पूर्वाधार र सम्पदा निर्माण सकियो, अब शिक्षा, स्वास्थ्य र रोजगारीमा बजेट थप्छौँ: मेयर चिरिबाबु महर्जन

काठमाडौँ — ललितपुर महानगरपालिकाका मेयर चिरिबाबु महर्जनले महानगर क्षेत्रभित्र पूर्वाधार विकास र सम्पदा संरक्षणका मुख्य कामहरू सम्पन्न भइसकेकाले अब आगामी बजेटमा शिक्षा, स्वास्थ्य र रोजगारीको क्षेत्रलाई पहिलो प्राथमिकतामा राखिने बताउनुभएको छ। बिहीबार ललितपुरमा आयोजित अंगदात सम्मान कार्यक्रममा बोल्दै मेयर महर्जनले महानगरको आगामी आर्थिक वर्षको नीति तथा कार्यक्रम र बजेटको कार्यदिशाबारे यस्तो धारणा सार्वजनिक गर्नुभएको हो।

मेयर महर्जनका अनुसार ऐतिहासिक पाटन दरबार स्क्वायरभित्र रहेका मठमन्दिर, शिवालय, देवालय लगायतका सम्पूर्ण मूर्त तथा अमूर्त सम्पदाहरूको जीर्णोद्धार र पुनर्निर्माणको काम लगभग सकिएको छ। विगतमा सम्पदा संरक्षणमा ठुलो रकम खर्चनुपरे पनि अबका वर्षहरूमा यस क्षेत्रका लागि ठुलो परिमाणमा अतिरिक्त बजेट व्यवस्थापन गर्नुपर्ने अवस्था नरहेको उहाँले स्पष्ट पार्नुभयो। महानगरको कोर क्षेत्रमा विकासका आधारभूत कामहरूले पूर्णता पाइसकेको उहाँको दाबी छ।

साविकको उपमहानगरपालिकाबाट महानगरपालिकामा स्तरोन्नति हुँदा पछि थपिएका खोकना, हरिसिद्धी, बुङमती र धापाखेल लगायतका क्षेत्रमा मात्र थोरै पूर्वाधारको काम बाँकी रहेको मेयर महर्जनले जानकारी दिनुभयो। तर, ती वडाहरूमा पनि विकास निर्माणका कामहरू तीव्र गतिमा अघि बढिरहेकाले अब पूर्वाधारकेन्द्रित बजेट विनियोजन गरिरहनु नपर्ने उहाँले उल्लेख गर्नुभयो।

भौतिक पूर्वाधारको चरण पार गरेसँगै अब ललितपुर महानगरले मानवीय र सामाजिक विकासमा आफ्नो ध्यान केन्द्रित गर्ने रणनीति लिएको छ। आगामी बजेटमार्फत शिक्षाको गुणस्तर सुधार, स्वास्थ्य सेवामा आम नागरिकको पहुँच र युवाहरूका लागि स्थानीय स्तरमै रोजगारी सिर्जना गर्ने कार्यक्रमहरूमा लगानी व्यापक रूपमा बढाइने उहाँले प्रतिबद्धता जनाउनुभयो। स्वास्थ्य क्षेत्रमा महानगरले यसअघि नै ठुलो लगानी गर्दै आएको र त्यसलाई अझ परिष्कृत बनाइने उहाँको भनाइ छ।

यसैगरी, महानगरवासीको सुरक्षा र उज्यालो सहरको अवधारणालाई मूर्तरूप दिन ललितपुर भित्रका मुख्य सडक तथा चक्रपथ (रिंगरोड) क्षेत्रमा आगामी चार महिनाभित्र स्मार्ट स्ट्रिट लाइट जडानको कार्य पूर्ण रूपमा सम्पन्न गरिसकिने जानकारी समेत मेयर महर्जनले सोही कार्यक्रममा दिनुभयो।